ວິສາຂາລ້ຳລຶກ
ໂດຍ: ສາຍເຊລຳເພົາ(ພອຈ.ເນືອງພິລັກ ໂຊຕິທອນ)
- ສິບນິ້ວຍົກໃສ່ເກົ້າ
ເນົາແນບເໜືອສຽນ
ລຽນລໍານໍາຊູຖວາຍ
ອັງຊະລີພຣະກອນນ້ອມ
ປັນຈາງກາຍກຽມພ້ອມ
ອະພິວັນທະນາການແນບເນັ່ງ
ເປັ່ງວາຈາກ່າວໄຫວ້
ວັນທາໄທ້ໜໍ່ພຸດໂທ
- ສຸຄະໂຕເລີດລໍ້າ
ພຣະອົງຍິ່ງເໜືອໂລກັນ
ພຸດທະວັນລີລາຜາຍ
ເປັນຍອດຄົນອະນັນລໍ້າ
ຍິ່ງກວ່າຄົນໃນກໍ້າ
ໂລກາໄກເກີນເຂດ
ທວາຍເທດເໜືອນ່ານຟ້າ
ວັນທານ້ອມຍົກຍໍ
- ພຣະອົງເປັນໜໍ່ໄທ້ ອົງເອກສັບພັນຍູ
ເປັນຍອດຄູຂອງມະນຸດ
ໝູ່ເທວະດາດ້ວຍ
ພຣະອົງສອນໃຜແທ້
ບໍ່ເຄີຍມີຕົກຕໍ່າ
ນໍາເອົາຕົນລອດພົ້ນ
ຈະເລີນກ້າວຮຸ່ງເຮືອງ
- ພຣະອົງເປັນບາດເບື້ອງ ເໝືອນດັ່ງນາວາຫຼວງ
ນໍາປວງຊົນນະຄອນຄາມ
ໄຕ່ຕາມພຣະອົງພົ້ນ
ບໍ່ວ່າຄົນສູງຊັ້ນ
ບັນດິດນັກປາດ
ຂ້າທາດສັກຕໍ່າຕ້ອຍ
ກໍນໍາຂ້າມບໍ່ໃຫ້ຫຼໍ
- ຈຶ່ງວ່າ ພຣະອົງເປັນໜໍ່ເນື້ອ ນາມໜຶ່ງພຣະສັດຖາ
ສາດສະດາອົງດຽວ
ຜູ້ອັ່ງນອງພຣະທຳແທ້
ນັບວ່າມີຄຸນລໍ້າ
ຫາໃຜທຽມທັນທ່ານ
ຈັກກະວານກ່າວຍ້ອງ
ນໍາພົນຂ້າມພຣະນິບພານ
-
ຄຸນພຣະອົງເກີນກວ່າລ້ານ ລົ້ນລື່ນເກີນຊິນັບ
ແທ້ດາຍ
ຈັບເອົາພຽງພໍຈາ
ກໍຍິ່ງສູງສະເໝີຟ້າ
ພຣະປັນຍາທິຄຸນກ້າ
ພຣະສັດທຳສັດຈະເຈດ
ພຣະອົງເທເທດໄວ້
ຫຼາຍລົ້ນລື່ນໄຕ
-
ພຣະບໍຣິສຸດທິຄຸນໄດ້
ໝົດຈົດຍອດບໍ່ມີໝອງ
ກິເລດມານຕາຍກອງ
ມຸ່ນກະຈວນກະຈາຍຟົ້ງ
ບໍ່ມີຫຼົງເຫຼືອໄວ້
ຄົງຄາຈັກສະໜ່ອຍ
ພຣະອົງກົງຈ່ອຍໆ
ສະເດັດເຂົ້າສູ່ນິບພານ
- ພຣະມະຫາທິຄຸນຍິ່ງສະທ້ານ ກວາມເມກເຮືອງຣິດ
ພຣະອົງມີເຫຼືອຫຼາຍ
ຍາກຊິພັນລະນາສ້ຽງ
ຜະດຽງນໍາພົນຂ້າມ
ໂອຄະຫຼວງອັນກວ້າງໃຫຍ່
ເໜືອແຜ່ນໄຕພົບພື້ນ
ຕາມເບື້ອງບາດພຣະອົງ
- ນັບຕັ້ງແຕ່ພຣະອົງໄດ້ ຕັດສະຮູ້ສ່ອງເປັນພຸດທະ
ໜໍ່ພຣະໂຄຕະມະ
ແຜ່ໂພທິຍານກວ້າງ
ແກ່ປວງຊົນທັງຫຼາຍລ້ວນ
ບໍ່ຜັນແຜແບ່ງແຍກ
ຍົກຍໍຊົດຊ່ວຍໃຫ້
ສະເໝີດ້າມດັ່ງກັນ
- ພຣະອົງນັບແຕ່ໄດ້ ຕັດສ່ອງສໍຣະຍານ
45
ວັດສາການ ບໍ່ເນັ່ງເນົານອນລ້າ
ຫວັງເພື່ອພາພົນຂ້າມ
ມະຫາສະໝຸດໃຫ້ພົ້ນເຂດ
ພຸດທະກິດທີ່ພຣະອົງສ້າງ
ຄວນອ້າງກ່າວເຖິງ
- ປຸບພັນເຫ ຕື່ນແຕ່ເຊົ້າ ພຣະອົງທ່ຽວໂຜດສັດ
ບິນທະບາດໄປຕາມທາງ
ໂຜດຄົນທັງຄ້າຍ
ໝາຍເພື່ອໄປປົດເປື້ອງ
ໃຫ້ບຸກຄົນໄດ້ພົ້ນຜ່ານ
ຫຼຸດອອກຈາກຄວາມໂງ່ຈ້າ ຫັນໜ້າສູ່ກະເສີມ
- ສາຍັນເຫ ຕາເວັນບ່າຍຄ້ອຍ ໂຄ້ງອ່ວຍລົງແລງ
ພຣະອົງເທສະໜາສອນ
ໂຜດຄົນທີ່ມານ້ອມ
ທັງໝູ່ລາຊາເຈົ້າ
ຄອງເມືອງນະຄອນຣາດ
ທັງອາມາດຮັບໃຊ້
ປະຊາເຊື້ອທຸກເຜົ່າຊົນ
-
ປາໂທເສ ມືດອໍ່າຄໍ້າ ມິດມີ່ຕາເວັນຕົກ
ພຣະອົງເທດສະໜາສອນ
ໝູ່ສົງພິກຂຸເຈົ້າ
ຜູ້ທີ່ຫວັງມາເຝົ້າ
ຖາມບັນຫາທູນເຫດ
ພຣະອົງເທເທດໃຫ້
ໄຂແຈ້ງຍົກພຣະທັມ
-
ອັຕຖະຣະເຕ ກໍ້າ ເດິກດື່ນທ່ຽງຄືນ
ຝູງໝູ່ຄົນທຳມະດານອນ
ແຕ່ພຣະອົງຍັງສອນເຊື້ອ
ເທວະດາມາເຝົ້າ
ພຣະພົມມາຖາມເຫດ
ພຣະອົງເທເທດໃຫ້
ໄຂແຈ້ງບໍ່ເສື່ອງອໍາ
- ປັດຈຸດເສ ແສງທອງອໍ້າ ໃກ້ຊິຮຸ່ງນະພາໃສ
ພຣະອົງຊົງຍານຫຼິງ
ກວດດູຂະຫຍາຍກວ້າງ
ຈ້ອງສ່ອງແຍງທິບພະຈັກຂຸຂ້າມ
ກວາມໄຕໂລກດ່ານ
ເຫັນສ່ອງຍານຢັ່ງຮູ້
ຄົນທີ່ຕ້ອງໄປຊ່ວຍປອງ
- ສິ່ງທີ່ພຣະອົງທໍານັ້ນຖືກຕ້ອງ ເປັນແບບຢ່າງຕາມຄວາມຈິງ
ພຸດໂທ
ເມ ນາໂຖ ເປັນທີ່ເພິ່ງພິງຄົນແທ້
ຂໍແກ່ວັນທານ້ອມ
ຍໍພຣະກອນນົບນ້ອມ
ເໜືອຫວ່າງສຽນເກດເກົ້າ
ຄະນິງເບື້ອງຫ່ອມພຣະທຳ
- ຊາວໂລກເບື້ອງຝ່າຍກໍ້າ ທະວີບອື່ນໂລກາໄກ
ຍົກເອົາວັນວິສາຂາມາ
ປະກາດໄກກຽງລໍ້າ
ຍົກເປັນວັນສໍາຄັນຄໍ້າ
ໃຫ້ປວງຊົນໄດ້ສືບຕໍ່
ສຶກສາແບບບາດເບື້ອງ
ພຣະອົງໄວ້ແລ້ວໄຕ່ຕາມ
- ຊາວພຸດລາວບໍ່ໄດ້ຂວ້າມ ກ້າວກ່າຍແລະລືມຫຼົງ
ເຖິງວັນເພັງເດືອນຫົກ
ໄດ້ຮ່ວມກັນຖວາຍນ້ອມ
ນັບແຕ່ລາວຈະເລີນຂຶ້ນ
ພັດທະນາເອກະລາດ
ຫຼາຍຮ້ອຍປີລ່ວງຂວ້າມ
ລາວກໍນ້ອມບໍ່ເສື່ອມຄາຍ
ຊອບແລ້ວ.
- ວັນນີ້ ເປັນວັນຄ້າຍ ເຫດການໃຫຍ່ໃນຊີວິດ
ພຣະອົງແລ້ວ
ເປັນທີ່ອັດສະຈັນໃຈ
ຍາກຄົນຊິທຳໄດ້
ຫາໃຜໃນຈັກກະວານກວ້າງ
ຈະທຳການເໝືອນພຣະອົງທ່ານ
ສາມເຫດການທີ່ກ່າວອ້າງ
ຄວນນ້ອມໃສ່ໃຈ
- ເຫດການໜຶ່ງນັ້ນບອກໄວ້ ເປັນວັນເກີດມະຫາບູຣຸດ
ໜໍ່ພຣະພຸດທາງກຸໂລ
ປະເສີດສີແສນລ້ານ
ເປັນກຸມານພຣະອົງນ້ອຍ
ກາງໄພປ່າໄມ້ໃຫຍ່
ສີສຸດໂທທະນະ-ມະຫາມາຍາມອບໃຫ້
ສາກົນໄດ້ເພິ່ງບຸນ
- ເຫດການສອງໄຕໂລກໄດ້ ເປັນວັນໃຫຍ່ມະຫາໄຊ
ຕັດສະຮູ້ພຣະແຂໄຂ
ແຈ້ງສ່ອງຍານເຍືອງຮູ້
ອົງພຣະສັບພັນຍູເຈົ້າ
ເຫັນປັນຍາທຳດວງປະເສີດ
ພຣະອົງເລີດລື່ນແທ້
ຫາໃຜໄດ້ໄປ່ສະເໝີ
- ເຫດການສາມໂລກອ່າວເພີ້ ພຣະອົງຈາກມວນມະນຸດ
ຫຼຸດຈາກໂອຄະຫຼວງ
ສູ່ນິບພານອັນນັນລ້ຳ
ວາງແຕ່ພຣະທຳໄວ້
ໃຫ້ຊາວຊົນໄດ້ຕາມໄຕ່
ໂລກວິໄລກ້າວໜ້າ
ມາເທົ້າທຸກວັນ
- ດ້ວຍສາມເຫດການໃຫຍ່ນັ້ນ ຊາວພຸດຈຶ່ງທໍາບຸນ
ເນື່ອງໃນວັນເດືອນຫົກເພັງ
ວິສາຂາບູຊານ້ອມ
ຂໍແກ່ຊົນຊາວເຊື້ອ
ເຄືອລາວນ້ອຍໜຸ່ມ
ຈົ່ງເຊີດຊູປຸ້ມລຸມສະຫຼອງວັນປະເສີດນີ້
ໃຫ້ຍືນໝັ້ນຢູ່ຄູ່ລາວ ທ່ານເອີຍ.
ไม่มีความคิดเห็น:
แสดงความคิดเห็น